ديناميت شرمب

 

مرحبا

الديناميت شرمب نوع من انواع المقبلات ناس تقول صينية و قرأت في مدونات ثانية انها مقبلات يابانية لأن تحتوي على المايونيز الياباني الحار

المهم يقدم في المطاعم الصينية ..فيه منه دجاج وفي هذي الفترة صار طبق مفضل عند كثيرر من الناس خصوصا من مطعم بي إف تشانغز

مايعتبر بالنسبة لي طبق مفضل لأن انا مااحب الصوص البارد او الغير مطبوخ..

هنا في هذي الوصفة مااحبيت اعتمد على  الصوصات الجاهزة..أولا لأن فيه تعليقات تجيني  يقولون ماحصلناه او مو موجود في منطقتنا يبغون بديل وانا مو واثقة اذا البديل بيعطي نفس النتيجة

و ثاني شي انا مااحسيت وصلت للطعم اللي ابيه من الصوصات الجاهزة يعني الا ويكون فيه شي غلط بالطعم حرارة زايدة او طعم غريب من واحد من الصوصات

فسويت صوص حار من البيت كان الطعم فرق كبير عن الجاهز..الكمية تكفي مدة طويلة ماراح تاخذون منها الا نص ملعقة صغير (ملعقة حلا) وهذي اللي اقصدها

في هذي الوصفة كل اعتمادي في مقياس المقادير على هذي المعلقة اللي بالصورة ههههههه 🙂 ..فحاولوا تمشون معاي على نفس الوزنية 

المقادير:

500 جرام ربيان صغير الحجم

ملح – فلفل اسود

نشا

بيض

مقادير الصوص:

200 جرام فلفل أحمر

نص م ص خل اسود

م ص سكر

رشة ملح

ثلثي كوب زيت ذرة

2 م ص مايونيز

نص م ص ماسترد

2 م ص ليمون اصفر

———————————————————–

اول شي راح نسوي الصلصة الحارة

هذا النوع من الفلفل الأحمر تلقونه في بنده و كارفور او مانويل  جدة احيانا لأن مو بكل مكان ينوجد

اطحنوه طحن ناعم جدا 

و بعدين على المقلا نضيف الزيت ونخليه شوي يحمي على نار وسط ..نضيف الفلفل المطحون و نقلب شوي ..وبعده نضيف الخل و السكر و الملح

ونوطي النار و نغطيه تقريبا يتسبك لمدة 5 دقايق مع التقليب المستمر..

و آخر شي نطحنه لحد ماتصير صلصة ثقيلة مهروسة

و نحطها في علبة بلاستيك مع م ك زيت ..لا تشيلون هم الزيت هو يعتبر مادة حافظة و أساسا ماراح تاخذون من هذي الخلطة إلا ملعقة صغيرة او نص في كل مرا

حاولوا تسوون هذي الصلصة قبلها بليلة و احفظوها في الثلاجة وقت ماتبغون تسوون ديناميت شرمب خذوا منها للصوص

ثاني شي الربيان..

نتبل الربيان بالملح و الفلفل الأسود و نغطيه بالنشا بعدين البيض بعدين نشا..ونقليهم..الربيان ماياخذ وقت في القلي  دقيقتين بالكثير ولو عندكم ثرمومتر اقلوا عند درجة حرارة 335 فهرنهايت بيطلع مقرمش مو شارب زيت..

هنا بناخذ الحذر في عدم شرب الربيان للزيت وقت القلي لأن راح نغطيه بصوص..

بعد ماانقلى الربيان ..نسوي الصوص

خذوا م ص او نص حسب درجة الحرارة اللي تفضلونها انا حطيت م ص من  صلصة الفلفل الحار

و اخلطوهم مع باقي المقادير الموجودة في الوصفة..و اخلطوهم مع الربيان

بالنسبة لكمية الصوص انا مااحب الربيان غرقان فيه فلو تفضلونه اكثر شوي زيدوا كمية الصوص حسب رغبتكم

الديناميت شرمب يفضل يقدم فورا او اذا ماعندكم وقت جهزوا الصوص من بدري و يصير بس عندكم قلي الربيان

و بالعافية